回味那些年印象:上@香港大學

山長水遠出到中環當然唔會只去ifc見下長毛象就打道回府咁浪費車錢，一於來次舊地重遊，搭91號巴士向第二站出發。

第二站去邊？咪就係上面喱度！西閘喱邊已經掘到幾乎唔認得，因為要起地鐵站。聽聞第時有自動扶手電梯一直由山腳伸到上黎，交通方便得多，不過就少左昔日行落山搭電車的懷舊味吧！仲睇咩地圖丫，Let's Go……



大門口立即見到這個「吾德物賜」大校章，以前好多人放學會約喱度等。左上是新建的玻璃幕牆嘉道理生物科技大樓，同四周圍完全唔襯，都係以前果幢維多利亞式的舊Chemistry building古雅一點，至少襯得上Main building，最懷念大樓前那片大草地……



以前有成排locker在廁所隔籬，果然仲係度！再行下D課室睇睇，由於今日有function搞，所以不少課室都佈置成文學院各系的展覽廳。有乜function搞，咪就係farewell Main building囉！



各系的展廳有大有小，不過展出的東西就不太多，可能喱個月份學生都掛住讀書應付大考，無乜人去搞啦！都係出去睇下荷花池吧，竟然無乜人，可以任影唔嬲兼玩下水。之後再行入去陸佑堂睇下先，好似都幾熱鬧。



陸佑堂裏面人山人海，好耐無見喱種大場面，不過實際上做緊咩就唔太清楚，襯一陣熱鬧就走人。



再出去四圍八卦下，英文系那邊都係無乜特別野睇，不如行上2樓逛逛。



迴廊上的地磚精巧細緻，聽說是19-20世紀初的英國貨，磚廠也早已停產，所以如果損毀了也極難找到合適的花磚修補，幸而百年以來仍尚算保存完好。



本來想去影「新舊對照」，可惜頂層的大鐘樓已不再開放，就求其影返張差不多鋪士的「對照」吧！右上是陸佑銅像；右下是下面的中庭，其實都幾高架！擒上去影相都有少少牙煙。



外圍羅馬巨柱的露台位平時都好少開放，但喱日就中門大開可以畀人入去影相，當然不會錯過這難得機會。聽說將來Main Building會變成行政大樓，學生不會再有機會來這裏上課，實在有點可惜。



咦，邊個無交功課呢？！定還是提人交功課？都係唔好理人地咁多野，繼續四圍行下，話晒大樓有成百年歷史，幾乎每一磚一柱都特別有歷史感，基本上香港現時都唔太多喱類歷史建築了。